غسول سيرافى رينيونج اس ايه Cerave Renewing SA Cleanser

مقدمة

النهاردة إن شاء الله هنتكلم عن واحد من المنتجات إللي بحب تركيبتها جدا إنتو عارفين إنى كصيدلي بحب تفصيص التركيبات والمكونات ولما بشوف تركيبة كده ببقى عاوز أسقف للي عملها بجد 

غسول النهاردة ينطبق عليه الكلام ده جدا غسول سيرافى رينيونج اس ايه Cerave Renewing SA Cleanser

هنشوف تركيبته بالتفصيل وهنعرف أهم فوائده واستخداماته وشوية محاذير برضه مهمة ومناسب لمين ومش مناسب لمين يلا بينا نبدأ

مكونات غسول سيرافى رينيونج اس ايه Cerave Renewing SA Cleanser

تركيبة الغسول ده بتعتمد بشكل أساسي على حمض الساليلسيلك Salicylic Acid حتى عشان كده هما مسمينه SA اختصارا للساليسيلك أسيد يعني و طبعا هو من الأحماض المقشرة إللي بتأشر الطبقة السطحية للجلد، ولكن عنده ميزة إنه هو محب للدهون وبيذوب فيها عشان كده بيكون مفيد جدا في تنظيف المسام من الدهون والشوائب والأتربة المتجمعة جواها وبيخليها سالكة ومش مسدودة وبالتالي بيمنع بقى تكون البثور والحبوب و المسام الواسعة وكل المشاكل دي وكمان تركيز حمض الساليلسيلك في غسول النهاردة من سيرافي مش عالي يعني مش هيزيد عن 1/2% بالكتير قوي وبالتالي التأشير في الغسول ده هيكون لطيف ومش قاسي. 

ولا هيكون في احمرار ولا التهاب ولا جفاف شديد خصوصا إننا عندنا مجموعة مركبات السيرامايد Ceramide إللي بتتميز بيها شركة سيرافى فى أغلب منتجاتها وإللي تعتبر هي اللاصق إللي بيلزق خلايا الجلد ببعضها وبالتالي إحنا بنرمم الطبقة الحامية للبشرة وبنحافظ كمان على الرطوبة جواها خصوصا اننا عندنا كمان مادة النياسينامايد Niacinamide المادة إللي أنا بحبها جدا ل فوايدها الكثيرة للبشرة واللى من ضمنها الترميم والتلطيف وتنظيم إفراز الدهون والمساعدة على التفتيح وتوحيد اللون والنضارة وبمناسبة النضارة عندنا كمان حمض الهيالورونيك Hyaluronic Acid وكمان صورة من صور فيتامين د المفيدة جدا كمضاد للأكسدة وكمان مواد التنظيف الموجودة في الغسول ده لطيفة جدا معنديش أي نوع من أملاح السلفات ولا عندي كحوليات ضارة ولا عندنا حتى عطور  

إستخدامات غسول سيرافى رينيونج اس ايه Cerave Renewing SA Cleanser

بعد ما شفنا تركيبة الغسول الرائعة دي. يا ترى إيه هتكون أهم فوائده واستخداماته وأكثر ناس هتستفيد منه

 الغسول ده مفيد لكل الناس إللي حابه تعمل تأشير لطيف. 

سواء عشان النضارة والتخلص من الجلد الميت الشاحب هتحس إن بشرتك بقت سموز كده وناعمة مع إستخدام الغسول ده

أو عشان المساعدة على تفتيح وتوحيد لون البشرة أو عشان إزالة الدهون الزايدة طبعا وتنظيف المسام. 

بس أكيد هو مش هيعمل ده كله لوحده هو جزء من روتين العناية ببشرتك أو بمعنى أصح هو أول خطوة في الروتين دا وبعد منه تستخدمي المنتج إللي انت حاباه على حسب غرضك و هدفك 

يعني ممكن تستخدمى بعده مثلا سيرم فيتامين سى أو سيرم النياسينامايد  هتحسي ان فعالية الحاجات دي زادت لأن التأشير إللي بيعمله الغسول بيخلي امتصاص المستحضرات إللي حندهنها بعده أحسن وأعمق. 

وحتى لو حابة تستخدمي سيرم أو كريم تفتيح مفيش مشكلة خالص بس بشرط ميكنش في أحماض مقشرة عشان أحماض مع حمض الساليسيليك ممكن يبقى كتير على البشرة ونعرضها للالتهاب فالأحسن نستخدم مستحضرات تفتيح لطيف بدون أحماض لإنه ميزة الغسول ده برضه إنه مناسب لكل أنواع البشرة، هما كاتبين عليه للبشرة العادية لكن أنا شايف إنه ينفع كمان للبشرة الجافة. 

لو محتاجة تقشير مش هيقول لأ أبدا و هيبقى مثالي جدا كمان للبشرة المختلطة لأن التركيبة بتاعته متوازنة جدا الحقيقة وينفع برضه للبشرة الدهنية بس لو دهنية قوي مش هتحسي أنو بينضفها بالكفاءة  بتاعت الغسولات المخصصة للبشرة الدهنية لكنه برضه ينفع للبشرة الحساسة

محاذير وتنبيهات قبل إستخدام الغسول

بالنسبة للبشرة الحساسة بقى هو ينفع للبشرة الحساسة بس مش حساسة قوي يعني لو إنتي بشرتك من النوع إللي هو بيحمر بسهولة جدا أو عندك وردية لا في الحالة دي مش هينفع برضه من المحاذير إللي لازم ناخذ بالنا منها إنه مينفعش نستخدمه مع أي حاجة ممكن تسبب إلتهاب لا أحماض فواكه زي ما قلنا ولا مثلا ريتينول أو أكرتين أو ديفرين والحاجات دي كلها يعني ده من باب الاحتياط والحذر منستخدمش الحاجات دي مع الغسول وطبعا من التنبيهات المهمة جدا استخدام واقي الشمس 

أي تأشير ضروري جدا يبقى معاه واقي الشمس مفيش كلام

هل ينفع أستخدم غسول سيرافى أثناء الحمل والرضاعة

 بالنسبة للحمل والرضاعه  الغسول آمن تماما و تقدري تستخدميه عادي جدا أثناء الحمل والرضاعة.

طريقة إستخدم غسول سيرافى رينيونج اس ايه Cerave Renewing SA Cleanser

طبعا هو استخدامه بيكون مرتين يوميا أو على حسب اللزوم، وبنسيب الرغوة بتاعته على البشرة لمدة دقيقتين قبل ما نشطفه زي أي غسول طبي يعني