النهاردة إن شاء الله هنتكلم عن واحد من مننتجات شركة ذا اوردينارى The Ordinary إللي هو نياسينامايد 10% Niacinamide بلس زنك 1%.
هنتكلم عن خصائص وفوايد المنتج ده. ومين أكتر ناس وأكتر حالات ممكن تستفيد منه وطريقة استخدامه الصحيحة وتجارب الناس معاه. وهل فعلا استفادو منه ولا لأ؟ وكمان شوية محاذير كده لازم ننتبه ليها وناخذ بالنا منها عشان ميسببش أي مشاكل فتابعو الموضوع ده للآخر. وقبل ما نبدأ لو في أي حد جرب المنتج ده ياريت يكتب تجريته فى الكومنتات
مكونات سيرم ذا أورديناري سيروم النياسينامايد والزنك
منتج النهاردة هو عبارة عن سيرم تركببته بتعتمد على مادتين أساسيتين نياسينامايد NIACINAMIDE بتركيز10% و مادة الزنك PCA بتركيز 1%
فوائد مادة النياسينامايد NIACINAMIDE
هنبدأ مع أول مادة وهي مادة نياسينامايد أو فيتامين ب 3 والحقيقة إن المادة دي من المواد المفيدة جدا جدا للبشرة هي ليها خمس فوائد أساسية
أولا هي بترمم وبتصلح الطبقة الخارجية والغلاف السطحي للجلد و بتحفز إنتاج خلايا جديدة للبشرة وبالتالي هي بتفيد جدا في أي حالة ممكن يبقى فيها تلف في الطبقة السطحية الخارجية دي زي مثلا حالة الإكزيما أو حالات الجفاف الشديد المصحوبة بتشقق
ثانيا هي بتخفف وبتقلل الالتهاب والاحمرار و بتلطف البشرة
ثالث فايدة للنياسينامايد إن هي بتساعد على التفتيح وهي بتعمل كده عن طريق إن هي تمنع انتقال صبغة الميلانين لسطح الجلد وبالتالي التصبغ الزيادة مابيظهرش على البشرة، ولكن عشان مادة النياسينامايد تقدر تعمل كده لازم تكون بتركيز ميقلش عن 4%،
رابعا هي بتقلل الشحوب واصفرار البشرة لأن ليها فاعلية كمضاد للأكسدة بالإضافة إن إحنا زي ما قلنا هي كمان بتحفز عملية تجديد خلايا الجلد عشان كده بتفيد جدا في النضارة وبتفيد في مقاومة ظهور الخطوط والتجاعيد.
خامس فايدة للنياسينامايد هي فائدة مهمة جدا إن هي بتنظم وبتسيطر على إفراز الغدد الدهنية وبالتالي بتقلل الدهون الزائدة في البشرة، وعشان كده هى من المواد المفيدة جدا للبشرة الدهنية والمعرضة لحب الشباب
وزي ما حضراتكم. شوفتو مادة عظيمة جدا وليها فوائد كتيرة جدا للبشرة والحقيقة شركة ذا اوردينارى عاملة السيرم ده بتركيز محصلش قبل كده يعني إحنا دايما كنا بنشوف مادة النياسينامايد في المنتجات التانية بتركيز إتنين في المئة تلاتة في المئة بالكتير قوي أربعة في المئة لكن عشرة في المئة ده يعني تركيز عالي جدا.
وفعلا أول مرة نشوف وعلى قد ما التركيز العالي ده له إيجابيات ولكن في نفس الوقت له برضه سلبيات
إيجابياته إنه هو فعلا هيقدر يحقق كل الفوايد إللي إحنا قولناها، خاصة موضوع التفتيح إللي زي ما قلنا.
عشان النياسين اميد يقدر يساعد في التفتيح لازم يكون بتركيز مايقلش عن أربعة في المئة. ف تركيز 10% هيقدر يعمل كده وزيادة،
أما السلبيات فالتركيز العالي جدا ده 10% على قد ما هو صحيح بيرمم البشرة وبيساعد إن هو يعالج التلف إللي في سطح البشرة والكلام ده كله ولكن ممكن ميبقاش مناسب للبشرة الجافة لأن زي ما قلنا هو برضه بيقلل نشاط الغدد الدهنية وبيقلل الدهون في البشرة.
فا التركيز العالي أو ده ممكن لو استخدمناه للبشرة جافة ممكن أن هو يزود الجفاف فيها وميبقاش مناسب ليها فهو مناسب أكثر للبشرة الدهنية أو المختلطة إللي ميالة أكثر للناحية الدهنية
فوائد الزنك بى سى ايه Zinc PCA
عندنا كمان في تركيبة السيرم ده مادة الزنك PCA بتركيز 1% وللوهلة الأولى قد نتخيل إن ال1% ده تركيز ضعيف ولكن الحقيقة هو تركيز مناسب جدا وكويس جدا بالنسبة للمادة دي
مادة الزنك بي سي إيه ليها فوايد برضه متعددة للبشرة أهمها إن هي كمان عندها القدرة على إن هي تقلل وتنظم إفراز الغدد الدهنية، وإن هي برضه مادة مكافحة لتكاثر البكتيريا وخاصة بكتيريا P.ACNE إللي هي المسبب الرئيسي لتكون حب الشباب فالواضح جدا أن تركيبة السيرم ده كلها على بعضها دا متوجهة بشكل أساسي وبتستهدف البشرة الدهنية المعرضة للحبوب
الحالات الأكثر إستفادة من ذا أورديناري سيروم النياسينامايد والزنك
وده هينقلنا للنقطة الثانية فى موضوع النهاردة مين أكتر ناس وأكتر حالات هتستفيد من السيروم
فعلا الحالات دي بتتحسن جدا على السيروم ده ولكن مع المداومة والانتظام زي ما هنقول بعد شوية السيرم برضه هيفيد زي ما قلنا في التفتيح هيفيد في معالجة الاسمرار ومعالجة التصبغات والبقع والآثار ولكن مش هيفيد في حالات الكلف الهرموني في حاجات تانية هتكون أفيد وأحسن للحالة دي
ممكن كمان نستخدمه لحالات الاسمرار حول الفم لأن السيرم ده مناسب للبشرة الحساسة فهيكون من الخيارات الممتازة جدا لتفتيح الاسمرار إللي بيكون حوالين الفنم
طريقة الاستخدام الصحيح لسيرم ذا أورديناري النياسينامايد والزنك
طريقة الاستخدام الصحيح على حسب كلام الشركة إن السيرم ده بيستخدم مرتين يوميا يعني مرة صباحا ومرة مساء ولكن نصيحتي إن إحنا نتدرج في استخدام السيروم دا لأن في حالات كثيرة فعلا حصلها التهاب وزادت عندها الحبوب في بداية الاستخدام.
فالأفضل والأحسن إللي إحنا نستخدمه بشكل تدريجي، يعني في أول أسبوعين هيكون مرة واحدة بس في اليوم سواء صباحا أو مساء مش هتفرق على حسب راحتك وعلى حسب الوقت المتاح عندك فا في أول أسبوعين هنستخدمه مرة واحدة بس يوميا وبعد الأسبوعين الأولانيين دول لما تكون البشرة اتعودت خلاص على السيرم، نبدأ بعد كده إللي إحنا نستخدمه مرتين يوميا، طبعا انت بتاخدي منه كمية بسيطة تلت أربع نقط يكفو جدا للبشرة كلها.
و ابتدائي إنك تدهني النقط دي بطريقة الطبطبه مش بتعملي تدليك ومساج بحركات دائرية زي المعتاد مع المستحضرات التانية ليه؟
إنتي هتحسي إن السيرم ده لازق شوية؟ ولو إنت عملتي كده بطريقة التدليك هتلاحظي إنه وبيفرول و إحساسه مش حلو فا إعمليه كده بطريقة الطبطبة ووزعيه كويس على بشرتك بالكامل واستني لحد ما يمتص بشكل كامل هو ممكن يمتص في خلال مثلا 10 دقايق أو ربع ساعة وبعد كده بعد ما يمتص بشكل كامل تقدري بقى إنك تدهني المرطب بتاعك أو تقدري تدهني مثلا واقي الشمس لو إنتي هتخرجي الصبح
تجارب الناس اللى استخدت سيروم ذا أورديناري النياسينامايد والزنك
تجارب الناس اغلبها مشجعة جدا الحقيقة أغلب الحلات شافت تحسن بعد شهر سواء في الآثار أوالبقع البنية أو الحمراء أو في الحبوب نفسها برضه اتحسنت بعد شهر
أو حتى كمان في المسام الواسعة اللى حجمها قل شوية وكمان اللمعة الدهنية والإفرازات الدهنية برضه إتحسنت بشكل واضح وكبير جدا، البشرة بشكل عام كأنها بتتحول من الدهنية لل عادية يعني ده أغلب تعليق و أكثر تعليق سمعته من الناس إللي جربت السيرم.
إن بشرتهم وكأنها بدأت تبقا عاديه ودي الحقيقة حاجه كويسة وممتازة جدا
طبعا في ناس زي ما قلنا طلعتلهم حبوب وحصل عندهم شوية التهابات في الأول عشان كده أنا بنصح ان إحنا نستخدمه بشكل تدريجي زي ما قلنا ولكن متقلقيش خالص يعني افضلي مستمر عليه وكملي عليه الحبوب إللي طلعت زيادة دي والالتهابات ديه تخف تدريجيا مع الوقت و هتتحسن جدا فمتقلقيش
محاذير وتعليمات مهمة جدا جدا لازم تنتبهي ليها.
أولا لو البشرة جافة ومافيهاش لحبوب ولا مسام واسعة ولا المشاكل دى فبلاش تستخدمي ده مش هيبقى أنسب اختيار ليك لو إنت عاوزة حاجة للتفتيح أو للنضارة في اختيارات تانية هتكون أفضل بكتير وأنسب بكتير لبشرتك الجافة.
ثانيا بلاش نستخدم سيرم فيتامين سى مع سيرم نياسينامايد في نفس الوقت في ناس تقلك نستخدم نياسينامايد مثلا الصبح و فيتامين سي بالليل أو نستخدم ده يوم وده يوم لأ بلاش في ناس فعلا بشرتهم اتبهدلت و حصلتلهم التهابات شديدة جدا لما استخدمت سيرم النياسينامايد مع فيتامين سي
الإستخدام أثناء الحمل والرضاعة
بالنسبة للحمل والرضاعة أبشركم إن السيرم ده امن تماما أثناء الحمل والرضاعة ومن الخيارات الممتازة إللي ممكن تستخدميها بأمان تام
تقييمى النهائي
الحقيقة السيرم ده ممتاز ونتائجه وتجاربه مع أغلب الناس وأغلب الحالات زي ما قلنا إيجابية جدا مع الانتباه للمحاذير والتعليمات إللي إحنا قولناها وخاصة إن هو يعتبر بصراحه سعره إقتصاديا وسعره يعني معقول جدا سعره كويس جدا في مقابل المزايا إللي بيقدمه.
تعليقات
إرسال تعليق
أخبرنا ما هو رأيك فى هذا الموضوع؟؟