هنتكلم إنهاردة عن واحد من أشهر مزيلات العرق بيزلين أو بيزلاين مزيل العرق المفتح ونشوف كل تفاصيله وكل المعلومات عنه يلا بينا
المادة الأساسية قى تركيبة مزيل العرق بيزلين
تعالو نروح للموقع الرسمي لشركة بيزلين أو بيزلاين عشان نشوف التركيبة التفصيلية لمزيل العرق الأشهر عندها أول مادة في تركيبة المزيل دا بعد المية على طول، و المادة الأساسية إللي بيعتمد عليها المزيل، هي مادة اسمها بوتاسيوم ألوم أو ألوم روك Potassium Alum (Alum rock) بمعنى أصح بنسميها بالعربي حجر الشابة أو بودرة حجر الشابة. طيب هل بودرة حجر الشابة دي تعتبر من أملاح الألمونيوم ولا لأ؟ هي صحيح إن هي مادة طبيعية وبتيجي من الطبيعة وبتكون على شكل بلورات كده ولكن هي في الحقيقة اسمها العلمي بوتاسيوم ألومبينيوم سلفات Potassium Aluminium Sulphate يعني هي فعلا ملح من أملاح الألمنيوم،
طيب بما إنها ملح من أملاح الألومونيوم ،ليه في اعتقاد إن المزيل دا من بيزلين هو خالي من الألمنيوم؟ لأنهم كاتبين عليه العبارة دي خالي من الألومنيوم كلورايد free from Aluminium Chloride
عشان كده فى ناس بتعتقد إن هو خالي من كل أنواع أملاح الألومنيوم
الفرق بين الألومينيوم كلوريد وما بين الشابة
طيب إيه بقى الفرق ما بين الألمينيوم كلوريد وما بين الشابة البوتاسيوم ألمينيوم سلفيت، الفرقان الألومنيوم كلورايد حجم الجزئيات بتاعته صغير وبتنفذ داخل الجلد وبتشتغل على منع التعرق لأن هي بتعمل زي عجينة كده بتقفل القنوات بتاعت التعرق إللي بيخرج منها العرق بينما البوتاسيوم ألمينيوم سلفيت أو إللي هي الشابة حجم الجزئيات بتاعتها كبير، وبالتالي مابتقدرش إن هي تنفذ داخل الجلد، أمال هي بتشتغل على إيه، هي بتشتغل على إن هي عندها خواص قوية كمادة مضادة للبكتريا.
بتقتل البكتيريا إللي بتكون السبب الأساسي في رائحة العرق لأن زي ما إحنا عارفين مشكلة منطقة الإبط والمناطق بتاعت ثنايا الجلد بشكل عام إنه بيزيد فيها جدا تكاثر البكتيريا لأن المناطق دي بتكون بيئة خصبة لتكاثر البكتيريا ونتيجة التكاثر الكبير جدا للبكتيريا بيحصل موضوع الريحة إللي مش كويسة للعرق.
فا بتيجي من هنا فكرة إستخدام الشابة للمناطق دي وكمان البوتاسيوم ألومنيوم سلفيت أو الشابة بتعمل زي طبقه على سطح الجلد والطبقة إللي بتعملها على سطح الجلد دي بتعمل نوع من التجفيف فكأن هي بتمتص العرق الزايد فهي مش بتدخل داخل الجلد ولا بتقفل القنوات بتاعت التعرق، هي بتشتغل بشكل أساسي على سطح الجلد من الناحيتين
الناحية الأولى إن هي مضادة للبكتيريا فتمنع تكاثر البكتيريا وبالتالي تمنع الريحة. والناحية التانية إن هي زي ما قلنا بتعمل الطبقة إللي بتعملها على سطح الجلد دي وبالتالي بتساعد شوية إن هي ايه تبقى زي ممتصة كده للتعرق الزايد بس مش بنفس قوة أملاح الألمنيوم التانية زي ملح الألمونيوم كلوريد في منع التعرق وأملاح الألومونيوم التانية بتقدر إن هي تمنع التعرق بشكل أكبر بكتير.
أنا عارف إن دلوقتي السؤال إلى بيتبادر على ذهنكم يعني معنى كلامك كده إن الشابة آمنة عشان مش هتمتص داخل الجلد ولا غير آمنة عشان هي من أملاح الألمنيوم.
هل الشابة إمنة ؟
بص يا جماعة موضوع أملاح الألمونيوم ده بشكل عام الحقيقة موضوع عليه جدل كبير يعني في دراسات وأبحاث كتيرة جدا بتقول إن مفيش أي دليل يربط ما بين أملاح الألومونيوم واستخدامها ك مضادات للتعرق وبين سرطان الثدي.
وعلى العكس في دراسات وأبحاث تانية بتقول لا ممكن يبقى في رابط ما بين أملاح الألمونيوم واستخدامها ك مضادات للتعرق وبين سرطان الثدي فالموضوع ده عليه جدل عليه لم يحسم بشكل تام لحد النهاردة ولكن نقدر نقول إن الشابة يعني تعتبر من أقل أملاح الألومونيوم احتمالا للخطر أو للضرر، يعني لو قلنا إن ملاح الألمينيوم التانية ممكن يبقى عليه كلام إنه ممكن يبقى ليها خطورة ف الشابة البوتاسيوم ألومنيوم سلفيت عشان حجم جزيئاتها الكبير، وإن هي مابتقدرش تمتص وتنفذ من خلال الجلد، فهي تعتبر أقل أنواع أملاح الألمنيوم احتمالا للخطر، فتبقى دي هي المادة الأساسية إللي بيعتمد عليها مزيل للعرق ده من بيزلين إللي هي بودرة حجر الشابة.
باقى المواد فى تركيبة مزيل العرق بيزلين
كمان عندنا في التركيبة مركب إسمه مركب تفلوز Teflose المركب ده عنده برضه خاصية إن هو مضاد للبكتيريا في بقى إحنا كده عندنا فاعلية مزدوجة على موضوع البكتريا، الفاعلية الأولى من حجر الشابة أو بودرة حجر الشابة والفاعلية التانية من مركب تفلوز فدي حاجة كويسة. جدا
بالإضافة لكده مركب تفلوز كمان هو مركب مكافح للالتهاب وبيساعد على تخفيف الإلتهاب في الجلد فمركب حلو جدا وإضافة رائعة في تركيبة المزيل ده طيب ده بالنسبة لموضوع العرق وريحته نتكلم بقى على موضوع التفتيح لأن المزيل ده المفروض إن هو كمان بيشتغل على التفتيح فنيجي نبص في التركيبة نلاقي ان إحنا عندنا مركب إسمه لوميسكين Lumiskin
طيب هل مركب لوميسكين ده مركب قوي في التفتيح ؟ الحقيقة لأ هو القوة بتاعته نقدر نعتبرها متوسطة يعني هو فاعليته متوسطة في موضوع التفتيح، وبالتالي هو مفيد لحالات الإسمرار و الغمقان البسيطة لو في اسمرار أو غمقان بسيط في منطقة الإبط ممكن فعلا المركب ده يفيد في تفتيحه وكمان هو هيكون مفيد جدا في الوقاية.
يعني هو فايدته في أنه ويحمى أصلا من حدوث الاسمرار و الغمقان في منطقة الإبط هتكون فاعلية حلوة جدا كحماية و كوقاية ولكن لو فيه تصبغات قديمة أو قوية و غامقة قوي و بقالها فترة طويلة لا بصراحة مركب لوميسكين دة مش هيكون كافي عشان يفتح اسمرار هو غمقان قوي في المنطقة دي
عندنا كمان في التركيبة مجموعة من المستخلصات الطبيعية عندنا زيت جنين القمح إللي هو طبعا مصدر غني بفيتامين إي وعندنا كمان خلاصة الصبار وخلاصة البقدونس الغنية بفيتامين سى وعندنا كمان خلاصة ورق الزيتون وكمان عندنا مادة العكبر
كل الخلاصات الطبيعية وكل المواد دي تعتبر يعني مواد لطيفة بتشتغل على موضوع الترطيب كمان
يعني في منها حاجات بتحتوي على مضادات للأكسدة فا إضافات حلوة و كويسة جدا لتركيبة المزيل ده. ومن أهم المزايا إللي بتخليكي تفكري إنك تشتري المزيل ده هي عدم وجود العطر فى بعض أنواعه وبالتالي هيكون حلو جدا للبشرة الحساسة وهيكون كمان مناسب لو انت كنت في وقت الإحرام بتعملي عمرة بتعملي حج ف تقدري تستخدمي النوع الخالى من العطر كمان من المزايا المهمة عدم وجود كحوليات ضاره خالص.
الكحول إللي موجودة هنا في التركيبة اسمه سيتايل الكحول، وده من الكحوليات إللي بنسميها، كحوليات دهنية، فالنوع ده من الكحوليات الحقيقة آمنة جدا مفيش منها أى أضرار خالص بالعكس دي ممكن كمان ترطب إيه
الخلاصة هل بيزلين ده كويس وايه نقاط ضعفه؟
أيوة كويس في مفعوله كمضاد لريحه العرق مفعول مزدوج في موضوع ريحة العرق كويس في إنه بيساعد على تجفيف العرق الزائد صحيح مش بقوة قوي ولكن برضه بيساعد في النقطة دي.
كويس كمان في الحماية من الاسمرار والمساعدة على التفتيح البسيط وكويس كمان لأن فى أنواع منه خالية من العطور فا زي ما قلنا هيبقى حلو جدا للحج والعمرة وكويس كمان للبشرة الحساسة لكن المزيل ده مش هيبقى أحسن حاجة لناس معينة زي مثلا الناس إللي عندهم تعرق زيد قوي الناس إللي بتعاني من التعرق، زايد جدا مش هيبقى كفاية. بالنسبة لهم المزيل ده
كمان الناس إللي بتعاني من حالات تصبغات و اسمرار قوية في منطقة الإبط طبعا ده برضه مش هيكون كافي لتفتيح التصبغات القوية وكمان الناس إللي قلقانة الناس إللي بتقلق شوية من موضوع أملاح الألمنيوم برغم زي ما قلنا إن هو موضوع لسة عليه جدل، وبرغم إننا قلنا كمان إن طبعا الشابة تعتبر من أكتر الأنواع أمانا في أملاح الألمنيوم ولكن في ناس برضه بتبقى قلقانة مش عاوزة تستخدم خالص أي نوع من أنواع من أنواع املاح الألومنيوم.
الناس دى مش هيبقى مناسب ليها إن هي تستخدم المزيل ده من بيزلين ممكن تفكر في بدائل تانيه تبقى خالية تماما من كل أنواع أملاح الألمونيوم زي مثلا الفيشي إللي هو الغطا بتاعه بيبقى لونه لبني في بيجي على شكل رول اون و بيجي على شكل بخاخ أو أنواع تانية كتير في حتى من نيفيا يعني نيفيا برضه عندها أنواع خالية تماما من الالمنيوم للناس إللي هي حابة تستخدم حاجات ميبقاش فيها أي نوع من أملاح الألومنيوم
تقييمى لمزيل عرق بيزلين
تقييم النهائي للمزيل ده هو 8/10 مزيل عرق كويس جدا وفي مزايا حلوة ومفيدة لناس كتير وبس ده كان موضوع النهاردة إللي منكم جرب مزيل العرق ده يا ريت يشاركنا تجربته في التعليقات. يهمني جدا أسمع آرائكم وتجاربكم
تعليقات
إرسال تعليق
أخبرنا ما هو رأيك فى هذا الموضوع؟؟